Edi
Neuffer

von Berthold Reisacher am 29.01.2024 - 18:05 Uhr | melden

Ond jetzt….a Nochbere mir verzählt,
dass em Langa Morga dr Edi fehlt.
Erscht wo i‘s hau en dr Zeitong gleasa,
isch des a trauriga Tatsach gwesa.
Ond jetzt….will i uf Schwäbisch schreiba,
was mir wird en Erinnerong bleiba:

A bsonderer Mensch isch dr Edi gwea,
so oin hot‘s em Flecka et nomol gea.
Dui Künstlermähne war zwar a bissle licht,
drfür war sei Vollbart lang ond dicht.
Isch der oimol bloß übern Weag dir grennt,
no hosch du dean Ma für emmer kennt.
Ond obadrei war‘s ganz ogwohnt,
dass oiner en‘ma Blockhaus wohnt!
Er braucht Frischluft, schätzt au d‘Natur,
isch z‘Fuaß, mit Rad ond Wohnmobil uf Tour.
Doch ganz alloi will er et sei,
drom isch sei Weible stets drbei.
Dia boide walket bei jedem Wetter,
rutschet übern Schnee mit Langlaufbretter,
suachet Kräutla für a Pestosoß
ond verwöhnet d‘Enkela, ob kloi, ob groß.
Samstigs kommt er mit em Körble vorbei,
kauft für da Sonntig Gmüas no ei.
Ond will em Freia amol gar nex glenga,
no tuat er zamma musiziera ond senga,
denn von de Eltera bis zom Kend
en dera Familie älle musikalisch send.
Mit Gitarre, Mondharf, Flöt ond Bass
spielt ‚Drops of blue‘ für jeda was.
D‘Neuffers send, so tät i des seah,
‚d‘Kelly Family‘ von Hattahofa gwea!

Mein tiefempfundenes Mitgefühl und herzliche Anteilnahme
aus der Nachbarschaft
Berthold Reisacher